電子傳媒冷待五區補選，怕被指幫公投造勢，冇乜興趣搞選舉論壇，浸會大學國事學會噚日率先舉辦第一場選舉論壇，新界東四名候選人中，除中大生周澄外其餘三人都有現身，長毛以一敵二，橫掃兩件蛋散。 承認自己零知名度嘅胡世全，噚日細訴參選心路歷程，話自己出身低微，細時穿膠花，大時被人蝦，試過三餐不繼豉油撈飯，曾經想輕生，感謝神帶佢認識基督，之後改名 Tiger重過新生；活到半百，覺得係時間回饋社會，一於參選。 另一候選人陳國強針對社民連掟蕉，話要譴責暴力行為，但原來佢仲暴力。自稱 89年六四時，曾有一名富貴舊同學，指示佢組織暗殺隊喺香港進行政治暗殺，佢講到繪影繪聲，聲言有份暗殺名單，「因為我係跆拳道黑帶，可以代表香港打亞洲賽。」 長毛斥陳國強亂噏 跆拳道都唔止，陳國強稱當年籌到筆錢整炸彈，筆錢後來交畀陶君行拎上北京支持民運。