喺城大做工程嘅地盤工友，踢爆城大唔畀佢哋喺城大 canteen食飯，八方前日問校方點解咁做，獲得一個模稜兩可答案，話 canteen供師生優先使用，又話會為工友準備飯盒，工友能否入內幫襯就唔肯講清楚。

民建聯季霆剛跟進事件，獲城大口頭回覆，證實校方已通知判頭，希望開學後工友盡量去附近南山邨食晏， 9月開始工友喺午飯時間高峯期，即係中午 12點半至 1點半，唔好去 canteen食飯，其餘時間可自由使用，呢個安排係唔想工友同 2萬幾個師生爭位。季霆剛話會跟進事件，不容大學搞階級歧視。城大校訓「敬業樂群」，教導學生要敬重專業知識、關懷社會，但係校方卻不仁對待為學校做工程嘅工友。