今年四川省政府邀請部分立法會議員去咗四川考察，唔少泛民議員都唔滿意，最終得兩個泛民議員參加。噚日立法會內務委員會討論議員應邀去到香港以外地方訪問嘅處理機制，社民連梁國雄就重提上次佢想跟立法會去四川考察，臨出發前一刻先收到通知，話四川省政府唔歡迎佢嘅事，佢要求立法會以後都要跟進呢類事件。
長毛話，當日四川省邀請議員去四川睇災區，由立法會自己決定派邊個去，原本已經拎埋入境紙嘅長毛臨到出發前一刻，先收到通知話佢無得去，解釋係話四川市民喺網上睇到佢嘅言行，唔希望見到佢出現。佢話自己至今仍然沉冤未雪，甚至無機會去四川告當地政府誹謗佢嘅名譽。
立法會秘書長承認當日無跟進到呢件事，話議員如果對安排不滿，可以之後再跟進，但長毛仍然好嬲，話覺得對方根本唔當香港立法會係一回事，呼之則來揮之則去，要求以後再發生呢啲事，要對方拎出證據咁話。