社民連主席陶君行早前與副主席吳文遠及秘書長季詩傑訪問美加，招收咗約 40人入黨，稍後會成立北美支部，日後選舉或搞社運時可在海外動員，八方聽聞喺入黨者之中，包括八九學運領袖之一程真。

夫唱婦隨入黨

程真喺六四事件後獲黃雀行動營救離開大陸，現時定居美國，據講社民連三子抵達洛杉磯同支持者見面時，程真率先交表申請入黨，而且表現十分積極，有人批評社民連抗爭路線時，程真雖然未係黨員，都挺身而出為社民連辯護。

陶君行證實程真交咗表，但是否已入黨則表示暫冇補充。據知由於社民連黨員需有香港身份證，程真唔係香港居民，所以要考慮如何酌情處理。八方聽聞程真丈夫莫偉強「肥莫」係社民連創黨黨員，程真入黨都算夫唱婦隨，有人問佢點解入黨時，佢話：「我丈夫已經入了黨，我不認同社民連，怎會入黨？」社民連同支聯會有牙齒印，今次有前學運領袖入黨，更表明認同該黨路線，唔知對社民連洗刷形象有冇幫助？